آن الأوان .. الشاعر محمد الطنطاوي
آن الأوان
و لابد حتما تعرفي
إني بقيت إنسان جديد
غير إللي كنتِ بتعرفيه
أنا نفس هذا الشخص
ماتغيرش لكن
كل حاجة اتغيرت فجأة في عنيه
و حاجات كتير لا هتقدري
تمحيها أو تتحمليه
فما تدفعيش تمن الحنين ذكرى
و عذاب و معافرة
ويا المستحيل تمن اللقا
ولا تحسبيش إني رضيت
إنك تسدي كل فواتير الغرام
غلب و شقا
ولا يوم هسيبك تغزلي الأيام
بصبري إللي اشتكى
أنا قلبي نفس القلب
مش غاوي الفراق
لكنه فاق
مابقاش بيحسب للزمن
و إزاي و ليه
ولا حتى أحكام المشيب
قدرت عليه
ولا أي شيء في الدنيا كان
فارق معاه
هينرفزك خلقه
إللي بيضيق كل يوم
و توترك رعشة إيديه
سايب فواتير الزمن
لسنين عجاف
يدفعها أو تدفعها عنه
في يوم إذا لحظتها خاف
هيعيش جبان
يستر دموعه ف حضنه
و يخبط في جدران الحياه
آن الأوان
تنسيه و تتحامي ف بقايا ضحكتك
و تكوني ذكرى جميلة
ماشية في سكته
لو لحظة تاه
