✍🏻بقلم : ساره العزيزى
وسط أيام السنة، ربنا اختار عشر أيام بس، وخلّاهم من أفضل الأيام على الإطلاق. هما العشر الأوائل من شهر ذي الحجة، أيام عظيمة بدأ بيها ربنا سورة “الفجر” وقال: “وَالْفَجْرِ وَلَيَالٍ عَشْرٍ”، وده قسم عظيم من رب العزة، ما يحصلش إلا لحاجة كبيرة جدًا.
أيام ربنا بيحب فيها كل خطوة منك :
النبي محمد صلى الله عليه وسلم قال:
“ما من أيام العمل الصالح فيها أحب إلى الله من هذه الأيام”
يعني أي حاجة حلوة بتعملها، من أول ذكر بسيط، لصلاة، لصيام، لصدقة، بتتاخد عند ربنا بأجر كبير جدًا، يمكن أكتر من أي وقت تاني في السنة!
ليه العشر الأوائل مميزة؟
الجميل في العشر الأوائل إنها بتجمع عبادات كتير في وقت واحد:
فيهم الحج، ركن من أركان الإسلام
فيهم يوم عرفة، اللي بيكفّر ذنوب سنتين!
فيهم التكبير، والذكر، والدعاء، والصيام
وفيهم فرصة لأي حد عايز يتوب أو يبدأ من جديد
يعني مهما كنت بعيد، العشر دول بوابة راجعة لربنا، من غير تعقيد ولا شروط.
خطتك للعشر سهلة وقريبه :
مش مطلوب منك تصوم العشر كلهم (رغم إنه مستحب)، ولا تقوم الليل كل يوم. المطلوب بس إنك تبدأ بخطوة صغيرة، تقول: “يا رب، أنا راجعلك”، وتحاول تحسّن علاقتك بربنا شوية بشوية.
ممكن تبدأ بـ:
إنك تقول: الله أكبر، لا إله إلا الله، الحمد لله كتير على قد ما تقدر.
أو تصلي ركعتين زيادة كل يوم.
أو تصوم يوم عرفة على الأقل.
أو حتى تبعد عن ذنب كنت مُصر عليه.
مش لازم تكون مثالي، بس خليك صادق :
مفيش وقت أنسب من كده عشان تغيّر. مش لازم تبقى مثالي، لكن خليك صادق.
ربنا مش مستني منك الكمال، هو مستني منك النية، والإخلاص، والخطوة الأولى.
