قصيدة أنا مين دلوقت ؟!
للشاعر وحيد الجمال
صعبتي عليا حقيقي الرد
و بنيتي مابيني و بينك سد
محتاجه لعمري و عمرك مد
أنا قلبي الكافر بيكي ارتد
اتشرنق جوه حيطان الوجد
متلخبطه روحي و جسمي اترج
متزلزله فيكي ساعات الوقت
جوايا سؤال و ماعنديش رد
محظوظ فرحان
و بعوم على شط من الأحلام
زي الخيبان بمشاعره اتصد
مربوطه عقارب عمري زمان
ببواقي كسور و جروح خذلان
و بلف معاها و أدور بالعكس
أنا ضد اليأس ماليش في البأس
ولا بعرف حتى كمان في الرقص
أنا خيط و اتشد
على وجعه اتمد
و دموعي عليه مابقالهاش عد
مقطوعة قساوتي ف حبل الود
و خدتني لتحت
منحوت أنا نحت
ماتبررليش أنا ليه في الفحت
و ماتسألنيش أنا ليه ما ارتحت
ماتطمنيش و تقول الحق
أنا ليه مع كل نهايه أتزق
و أنا ليه برتاح مع كلمة لأ
الليل ماجانيش
و أنا غيره ماليش
ولا طمن قلبي طلوع الفجر
طبطبي على روحي و غنيلي
يمكن في الكسر تضميني
افردي بربيعك فوق نيلي
و اجدلي من حضنك مواويلي
ياقصيدتي الحيه في دواويني
أخرجي من وجعي و صحيني
و إجابتك تسكن في ضميري
أنا مين دلوقت ؟!
