شكلى ح أموت .. الشاعرة هيام حمزة
أنا مهزوم
و جوايا كلام موزون
يحاكي الكون من غير صوت
أنا مش حاسه بالدنيا
ولا خايفه من الآخرة ولا م الموت
أنا مش لاقيه ليا حلول
و بالعربي مانيش راضيه
أنا عمري وقف عنده
علي باب الندم مربوط
و نبضي سريع ماهوش مظبوط
أنا محتاجه حضن و بيت
وطن و ياريت
حبيب تانى
شعور تانى
يصحي فيا وجداني
أنا مش عاوزة
أكون عاشقه ولا معشوقه
من ده الحد
ولا وردة يجيبهالي
و يطلب ود
ولا حاجه تضايقني
آخرها الصد
لكن مش لاقيه ولا سكة
تمهدلي طريق البعد
أنا فى كل الحالات مهزوم
بتنقص منى دقة قلب
و بتضيع مني تنهيده
بقيت أعرفني بالخيبه
أنا اللي الناس كانت بتشوفني تتبسم
و ناس أبهرها ف تبلم
و ناس تيجي تبوس إيدي و تسلم
روحي حزينه ليه طيب
عشان القلب كان طيب
و دلوقتي صبح دبلان
و دمى تقيل
و ملامحي بترسم بور من الخذلان
مانيش مرتاحة
ولا نافع معايا علاج
طب أعمل ايه ؟!
دلوني
خلاص القلب مش مبسوط
ولا راضي
ولا دقاتة مظبوطه
كما الماضى
مانيش مرتاحه و الله
طب أعمل أيه
شكلي ح اموت !!
