جرح جديد .. الشاعرة رباب الجورية
أنا و عيونك الخاينين
ما بينا كلام كتير لسة
ما بينا حكاوي و اعترافات
تنيّم قلبي كالجثة
فى حضن الغدر يتقلّب
على الجانبين
و يتغطى بتجريحك
و مفرش من دموع العين
و أنا الغرقان على شطك
بكاس كدبك بترويني
فتحييني
و أشرب
و إنت تتمطع
على قلبي إللي م الخايبين
م أنا إللي عشقت ف عيونك
و سيبت عيون لناس صادقين
أنا الل استاهل اني اتْسَاب
مانا إللي آمنت و فقلبي
فتحت لقلبه كل أبواب
و أنا إللي فى عينه شفت الغدر
ويّا الكدب متغطّي بطرحة و شال
و شفت الصدق متعري
و مش عاكس صدى صورتي
و قلت لنيتي إصفي
كفاية عتاب
أنا إللي قبلت ب الفتافيت
و قلت بواقي من حبه
و صَدَقة و حَسَنة من قربه
و حبًي يابت و إتحبي
و عشت فى دنيا مش ليا
بلملم أي باقي يفيض
أنا إللي رضيت
بنيت من قسوته جنة
و جدلت الخداع حواديت
عملت بكدبه ضليلة
فرشت عيوني ليه عناقيد
و نام و اتغطي بحناني
و غطاني بجرح جديد
