هَـ امُوُت إمتىَ ؟ للشاعر محمد عبدالعزير

هَـ امُوُت إمتىَ ؟
للشاعر محمد عبدالعزير

أنَا العَاجِز … هَزمنى السِن
رَمَانىِ عَ السِرير جتَة
أكَلنىِ حِتة ورَا حِتة ..
وِ ضَاقِت دُنيِتىِ عَليَّا ..
زَهَدت الأكَل وِ المَايَة
وِ كُل الدُنيَا حَواليَّا ..
عِيوُن غرّقَانَة فِ دموُعهَا ..
عَلىَ سُورِة ( يَس ) بِتئِن ..

وِ شَايف عَ الوِشوُش أحزَان …
بِتِتوَزَّع …
مَعَ القهوَة اللىِ شَاربَه المُر فِ الفِنجَان
وِ شَايف صُورَة مَهزُوزَة ..
لِـ نَاس مَاتِت بَقىَ لهَا زَمَان
بِتضحَك لىِ وِ تِسألنىِ ..
هَـ امُوُت إمتىَ ؟! …
لَقِيت الرُوح بِتِتشعلَق فِ طَاقِة نوُر …
وِ جِسمىِ للتُرَاب بِيّحِن ..