الجن العاشق … الشاعر أحمد مغربي
أنا شوفت الحلم أربع مرات
عمال بيدور
و كأني مشارك في البروفات
ب أحفظ في الدور
و لقيتني في قصر بيتحول
فجأة لمهجور
الضحكة اتحذفت م المشهد
و اتطفى النور
و أنا واقف وحدي على المسرح
و بدون جمهور
و بأدي في عرض مالوش معنى
و مانيش مسرور
فيه مشهد ناقص في القصة
فيه شئ مبتور
مع إن الأحداث الهامة
حواليه بتدور
الأمر الواقع مش واقع
وماهوش منظور
المنظر كله يبان غامض
و يبان مسحور
في جن بيظهر ع الخشبة
و يهد ديكور
و يلخبط كل حروف النص
و بيشهد زور
الجن العاشق للبطلة
عفرتلي الدور
