إللي صان العشرة زاد
للشاعر محمد البياع
هما أول حَد كان يطلب يلاقي
أما أنا كُنت البَواقي
لِسه سَاقي زَرعهم من كوز صيامي
ريقي ناشف من لساني الحلو ليهم
بس هما الله يسهل
كانوا يجنوا زرع إيدي
و كنت أكمل
وأما غابوا عن عنياإشتاقت ليهم
وأما رجعوا رجعوا داسوا ع اللي ليهم
هما هما مهما نعمل برضه هما
و أما ندي ياخدوا هما
الحصيرة الفارشة دارنا
كات عشانهم
زيرنا أصلا مَل منهم
ميكرفون ذاع في البلاد
عشرة جاهزة ع المزاد
جريوا باعوا العيش بلاش
و إللي صان العشرة زاد
و إللي باع العيش مجاش
توتة صالبة الضهر لكن
الفروع ضالة الأماكن
هما قطعوا فروع هوانا
و إحنا لسه الجرح ساكن
قالوا فينا الخمر يسكر
و إحنا قولنا الخير بحاله
بس ربك كان بينصر
و إحنا نسكت مهما قالوا
هل حصاد الخير شرور
هل حصاد الشر خير
بكرة واقفين ف الطابور
كل حي وله مصير
عششي ياعشرة عاشت
شقشقت من خير فؤادهم
لما خانوا العشرة باشت
و إللي صانوا العشرة زادهم
قالوا وسط الناس علينا
إننا ملناش نعاشر
و إننا ملناش أحبة
توبنا هَفهَف ع المناشر
و الحبايب زادوا حَبة
