كنكة شاي
للشاعر محمد عبيد
يا أجمل من آهات الناي
يا عمري الجاي
أنا مش قادر أوصفلك
و أقول إزاي
لاقيت فيكي الدفا و الحب
يا أجمل روح و أطيب قلب
لاقيت فيكي كمان عمري
ملك أمري هواكي و قولت
مش عاشق
لغيرك حتى لو فارق
هواكي القلب و نسينى
يا نور عيني
و أنا و الشعر و حروفي
كتبنا لجل ما تشوفي
مكانك بين سطور الروح
بتنطق بالهوى و تبوح
و حبري دم أوصالك
برعشة شوقي واصلة لك
كتبت الشعر علشانك
لاقيته الشعر من حالك
بيتهادى فى موالك
و أنا بتمنى أقولهالك
بدون حورات
ولا اشتغالات
أنا منك و ليكي هكون
و لو حتى هلف الكون
راح أرجعلك بكل الشوق
يا أحلا شروق
فى ليل صافي و كنكة شاي
بتغلي من لهيب وجدي
و صوتها يفور
ألاقي عيوني واقفة طابور
بتستنى تشوف الضي
و تتمنى ما تلمح شى
سوا عيونك يا ست الناس
يا مالكة القلب و الإحساس
نويت بيكي أعلي أساس
عشان قلبي ما هوش نساي
ولا ناكر جميلك يوم
ببات و أقوم أقولها لك
و أغنيها فى موالك
مافيش محنة أكيد هتدوم
فقومي و طيبي بخاطر
قلوب شقيت عشان خاطرك
و كانت روحها دي مهرك
و هاتي من عسل شهدك
دوا للى ف هواه محروم
