من غير عنوان
للشاعر محمود محمد
من غير عنوان
القصة اتكتبت نهايتها
و بدون أركان..
لا بداية و حبكة و حدوتة
لا زمان و مكان..
الصرخة أهي طالعة بتستنجد
بالفجر اللي معاند يولد
شمس الحدوتة و بدايتها
فـ يصيغ عنوان…
شجر الأحزان..
ف عيوني أهو راسم عناقيده
و بيشحت م النخل جريده
لاجل أما يهوِّن على قلبي
أتاريه بيحاوط و مخبّي
قصر الجنيّة اللي فاتتني
في بحور توهان..
مين قال إن العين فضّاحة
بتعبّر و بكل صراحة
أنا ياما بعيني رسمت غرام
و مليت ف سطور.. و وزنت كلام
و بكل براءة و طفولية
و بضحكة “ليلى” فـ أغنية
بتقول الله يسلم قُولك
معشوق الغزل دا من نُولك
أتاريني ف آخر الحدوتة
“مرواني” و لعنيها ضحية
من غير عنوان…
ولا صلوا على حبيبكوا الغالي
ولا كان يا ما كان
خلصت ببساطة الحدوتة
اسودت أوراق النوتة
و الغنوة أهي تاهت ف وداني
ملقتش مكان…
مات العنوان..
