كان مرة في
الشاعر الراحل أدهم الزهيري
كان مرة في عيل سفيه
كل إللي ليه بيضيعه
كان مرة في عيل سفيه
مكسور محدش جمعه
قصد الأماكن عتمت
سكن الشوارع ضلمت
عيل ملامحه اتيتمت
من قبل حتي ما يطلعوا
كان مرة في أب و راميه
من أم رافضة ترضعه
كان مرة في صندوق خشب
و جوز فرش
و جسم من التعب إتفرش
يصبغ مكانه و يطبعه
عيل كنس عفر الطريق
خاوى الكلاب في الليل دفي
و الإغتصاب في عيون بريء
يجبر ضياهم ينطفي
سهران في ليل و ضمير نيام
كان مرة في عيل حانيه
إحساسه بصعوبة الكلام
وردوده ع إللي بيسألوه
إسمك؟
مفيش
سنك؟
بعيش
و المهنة ؟
ربطوني بلجام
و اليوم بيتبسم لأخوه
و يسلموا لبعض الزمام
و أنا جدر و بدون إهتمام
صلبوه في أرض مشققة
ماعرفش إيه معنى الفرح
ماعرفش غير معنى الشقا
ماعرفش إيه يعني اللعَب
و اللقمة من غير مشنقة
متسلسلة بحكم الظروف
كان مرة في عيل سفيه
رضع الألم فطموه بخوف
من بكرة و كسور الصدام
كان مرة في مليون سفيه
من غير حساب نتجوا الحرام
