فلاش باك … للشاعرة ولاء بركاوى

 فلاش باك … للشاعرة ولاء بركاوى

وسيناريو تملى بيتكرر

الليل والوحدة واسرارها

الحرب الدايرة ف أفكارك

ودراما الاحداث تتوالى

وفلاش باك يبدأ ويطاردك

الصورة بتوضح ادامك

وحاجات كات طوعك وف إيدك

تبدأ تستقوى وتتمرد

الحيرة تقوم تلعب دورها

الفكر بيغلب ويسيطر

والليل الله يعمر بيته

عمال بيطول فى المشهد

وانت المتلقى بإتقان

ولكنك واقف متشتت

 ولا حاجة بتشبه إحساسك

دايرة وبتلفك حواليها

وتحطك مطرح ما بترسى

ورفضت رضيت

صرخت بكيت

سلمت قويت

بردو انت المغلوب على أمرك

الدايرة بتوسع من حواليك

ولا حيلة قصادك ولا مخرج

تتحايل ع العين تلايمها

وتفض العركة وتهزمها

وتروح فى النوم

ولكن الكترة بتغلبها

ترميك للوحدة وألاعيبها

تتسلى وتتونس بيك

تتدارى ف دمعك ف يطاوعك

يراضيك ويطبطب على حالك

يقلب موازين الحدوتة

ما هو أقرب صاحب تلجأ له

وما تهونش عليه

فا تحس الحيرة بتتبدل

والعتمة تقرر تستأذن

تسند على روحك وتعدى

وتلم خيوط وجعك بإديك

وتحل ف عقدة أحزانك

وتعافر وتفض الحيرة

ف تحس أمان

ف برغم الوحدة وقسوتها

والحرب الدايرة ف أفكارك

والليل والمشهد وحكايته

والفكر اللى تملى بيغلب

ويسيطر جدا على حالك

تطلع كسبان