تعافي …. للشاعرة هبة سمير
قدرت ازاى تعيش اللحظه وياهم
وانا الثانيه فى حضنى سنين
وانا الشاهده على التفاصيل
وانا العايشه معاك عُمرين
ولما كنت تتنفس
بقول نفسك دا واصل فين
يجوز بُعدك وجع واحد
وانا الموجوعه بيك وجعين
قرار البُعد كان هِجره
مابين قلبي وبين عقلي
تدبدب جوَّه مني حاجات
بـ رجلين شايله في كعابها تراب عاشقين
وسكة تطول ما تقصرشي
بقشر اللب ويا الطين
تزغزغ روحي بالأيام وهمس عيونا ع الممشى
وتكعيبة عنب نومنا على شوقنا، فأصحى أوام
وأقوم قافله البيبان ع الشيش
مانيش ناسيه الهوى كدَّاب
ولا ناسيه دموع عيني وانا بقرأ يس وادعي
واقوله يارب..
يموت قلبي عشان يرتاح من النغزه
وقبضة وعدُه جوايا في يوم ماجانيش رسول الموت ..
فـ ليه دلوقتي انا عايشه مادُمت باموت
لكن ربك عشان عادل
بعتلي اشاره واستقبل دعايا سنين
رجعت فـ إيدَك النشره
وفي العناوين أنا مانشيت
ومن بعدي تفاصيل العَتَب واللوم
على راحة خُطى روحي بدات العد واتمشيت
ومن قربك ،ومن هجرك ،ومن شرك أنا عديت
ووشوشت السما ضحكت
وهلِّت بالمطر عِفَّه على جبيني
غرفت من المطر كبشة
فتغسل ضلعي وظنوني
وروحي السابحه في التوهه كده فومين
نشرت القلب ع الدنيا يرحرح في الهوا تاني
يزحزح نوبة الحزن اللي قلقاني
وهندِمت الفؤاد عادي بنبض جديد
ودقه جديده كتباني صباح صافي
داويت كعبي اللي شقق م السفر حافي
كسيت حزني اللي متعرِّي بفعل ايديك
كإني رصاصه خرجت من سلاحك فيك
نهاية عمرها كانت قصاص عادل
اشوف الفرح بيداوي الألم فيا
وأشوف الحسره بتدغدغ فؤاد معاليك
