متابعة / هند البحيرى
س: ياترى لو ربنا توفاني دلوقتي.. مصير ولادي هايكون ايه من بعدي؟
ردا علي هذا السؤال
فقد قال دكتور مصطفى الديب
هناك تفصيلة معينة كده بستخدمها أثناء جلساتي مع أي حد بيعاني من قلق المستقبل، خصوصًا الخوف على الولاد من بعده لو مات..
الموضوع ده رغم إن التفكير فيه مرهق، لكن له استراتيجيات علاجية بتخفف من وطأة التعب اللي ممكن يعيش فيه الشخص، وبحاول أشرح له الأبعاد من كل النواحي بشكل عقلاني و نفسي بحت.
لكن لا أخفيكم سرًا، موضوع الخوف على المستقبل والقلق على الولاد لو الأب والأم ماتوا؛ لازم له جزئية كده تخص العقيدة، تخص اليقين بالله، تخص قناعة الشخص تجاه حسن الظن بالله، تخص ذاكرته اللي لو ركز معاها كويس هايلاقي إن ربنا ماضيعوش ولا ضيع غيره، وحاشاه سبحانه إنه يفعل هذا بعبده، فامش هايضيع عياله أكيد، لإنه ببساطة أرحم بالولد من والديه.
وبعد الأخذ بالأسباب إنك تأمن ولادك نفسيًا وتربويًا وماديًا قدر المستطاع قبل وفاتك، هايتبقى لك فقط التسليم الكامل لله، وحسن الظن به، لانه حقيقي هو حسبك ونعم الوكيل.
بسم الله الرحمن الرحيم
وَلْيَخْشَ الَّذِينَ لَوْ تَرَكُوا مِنْ خَلْفِهِمْ ذُرِّيَّةً ضِعَافًا خَافُوا عَلَيْهِمْ فَلْيَتَّقُوا اللَّهَ وَلْيَقُولُوا قَوْلًا سَدِيدًا.
صدق الله العظيم.
#د_مصطفى_الديب
