الرشةالجزايرية تحضر في الاعياد والمناسبات مع شيف وسيلة

الرشة الجزائرية تحضر في الاعياد والمناسبات مع شيف وسيلة

رشتة بالدجاج

المقادير

كمية من رشتة حسب افراد العائلة

كمية من سمن

شوي زيت

ماء زهر

حبات لفت مقطعة على نص

حبة بصلة كبيرة مرحية مليح

حفنة حميصة مشمخة من قبل

عود قرفة

أطراف الدجاج

2 حبات لفت مسكرفجة في رقيق

ملح فلفل ابيض

ماء وشوي ملح نرشو بيه الرشتة

طريقة التحضير

في جفنة نحط كمية تع الرشتة ونرشها بشوي زيت ونحلها مليح بيديا من بعضاها ونرشها بشوي ماء فيه شوي ملح ونزيد نخلط ونحلها بيديا ونخليها تتشرب

المرحلة التانية

نأخد قدر وكسكاس نحط في قدر كمية من السمن ونزيد شوي زيت تكون الكمية مليحة نخليهم حتى يسخن ونرمي أطراف الدجاج يتقلو نزيد حبة بصل كبيرة مرحية نقليها ونزيد مسكرفج 2 حبات لفت وشوي ملح وفلفل ابيض وعود قرفة نقليهم مليح ونمرق بالماء سخون يكون شوي زيادة ونرمي الحفنة تع لحميصة ونخلط ونحط الكسكاس على القدر ونحط الرشتة تفور تفويرة اولى ومانغطيهاش وبعد نفرغها في الجفنة ونرشها بشوي ماء فيه شوي ملح ونحلها بيديا ونخليها تتشرب ونزيد نرمي الحبات اللفت في القدر ونزيد نرجع الرشتة تفور التفويرة تانية بعد ماتفور مليح نفرغها في الجفنة ونرفد بالغراف من القدر ليدام لملفوق كامل ونحطو فيجفنة ونزيدلو شوي زبدة ونخلطو ونزيد نشربها بيه ونخليها تتشرب شوي ونزيد نرشها بشوي ماء زهر الرشتة نفورها غير 2 تفويرات ومانغطيهاش تتعجن من الماء لقطر عليها

 ونفرغها في صحن التقديم ونستف فوقها اطراف الدجاج واللفت ولحميصة ونرشها بشوي قرفة وتقدم شهية طيبةاشاء الله تعجبكم كل عام وانتم بالف خير يارب