شكوكو هو الفنان الوحيد في مصر اللي كان بيتعمله تماثيل 

شكوكو هو الفنان الوحيد في مصر اللي كان بيتعمله تماثيل

القصه دي حلوه اوي وبتبين صياعة المصريين

– كان زمان بيلف بياعين تماثيل صغيره كده على شكل شكوكو شوارع مصر كلها .. الغريب في الموضوع انهم مكانوش بيبيعوها بفلوس لا .. مكانوش بيرضوا يبيعوها غير مقابل قزازة حاجه ساقعه ( زجاجة مياه غازيه)

– اي حد عنده قزازه يديها للبياع وياخد تمثال شكوكو .. وكانت الناس حرفيا ما بتصدق الراجل يعدي هووب البضاعه كلها تخلص ..

⬅️ الحكايه دي وصلت لشكوكو وفرح جدا بس استغرب ليه يعني مبياخدش قرش ساغ ولا اي فلوس .. ليه قزازة حاجه ساقعه

دور ورا الموضوع واكتشف حاجه جميله اوي

– ايام الاحتلال كانوا الفدائيين وفرق المقاومه بيعملوا قن*بله صغيره عباره عن شوية بنزين او سبرتو في قزازة حاجه ساقعه وفيها حتة قماشه يو*لعوا فيها ويرموها على اي حاجه تبع الاحت*لال يحر*قوه

– الانجليز مكانوش عارفين يعملوا ايه لان النااار بتبقى عشوائيه وبتمسك في اي حاجه قدامها وبتاخد وقت على ما يعرفوا يطفوها..

– ففكروا انهم يمنعوا خااالص قزايز الحاجه الساقعه وفعلا القزايز بقت قليله اوي في السوق وتم استبدالها بالبلاستيك وطبعا ده لما بيتحدف مبيفر*قعش زي القزاز

طب نعمل ايه؟؟

فكروا مين اكتر حد محبوب وملاقوش ساعتها اكتر من شكوكو في الاحياء الشعبيه .. بقوا يعملوا تماثيل كده صغيره شبه شكوكو بجلابيته وشنبه وطاقيته ويبدلوها بالقزايز

– زمان كان المصريين بيحتفظوا بالقزايز وتروح عند البقال تبدلها بواحده مليانه وتدفع نص الثمن بس فكان كل البيوت فيها قزايز

– وفعلا الفكره انتشرت والناس كلها عجبها التمثال وبقت تبدله وده بقى يوفر للمقا*ومه القزايز اللي محتاجينها عشان يرموها على الانجليز

شكوكو وصل لحقيقة الموضوع ده واللي حكى الحكايه دي ابنه سلطان

لله يرحمه كان جميل ودمه خفيف واغانيه حلوه ويدخل القلب بسهولة