لابس وش تاني”بالعامية المصرية “
بقلم الأديبة والشاعرة والكاتبة الصحفية
حنان فاروق العجمي
يالا روح مش أنا نفس الروح
بخيرك وشرك روح
بقيت تاريخ ممسوح
مكنتش أد اللي ادِّيتُه
مكنتش أد الروح
أفتكرلك حلو إيه
وكل الوحِش غطَّى عليه
أفتكرلك إنك أناني
عمري كلُُه كنت بعاني
قل لي فين كان اماني؟
وإمتى حسِّيت بحاجة مفرحاني
أخدتني من نفسي ليه؟ وليه سرقت حناني؟
عِشت أدوَّر ع اللي ناقصني
وأبكي ع اللي فايتني
مكنتش فاهمة إن مكانك فاضي
وإنُّه خيال بدون معاني
واتسألت عن عنواني
معرفتش اقول غير إني ناسياني
فينك من حياتي؟
فين راح تاه كياني؟
دورك خيال الضل الاناني؟
ليه مقولتش لأا؟
ليه اتحمِّلت؟ وليه أذاني؟
دنيتَك الفاضية انا اللي مليتها
ليه كنت خاطفني؟ ليه كنت سجَّاني؟
قلبي كان طفل ف إديك
طعنتُه بكل قوة
دفنتني حيَّة ف مكاني
قل لي فين كان ضميرك؟
كل ذكرى معاك مآلماني
ولسَّه بتقول جناني!
يا ليل وقَّف زماني
يا طعم المُر ف أيامي
يا دموع وندم أحزاني
مين كان السبب؟
مين قسَّاني؟
مين اللي هد؟
مين قطَّع حبال الود؟
وليه نزف شرياني؟
لكن كان خير ربِّي هداني
طلعت غريب وعمرك ما كنت قريب
وعنيا كانت خادعاني
وكنت تمثال ف حياتي
لواحد غير اللي عرفته
لواحد غشاش عدواني
بيبدِّل ف الأقنعة
زي مُهرِّج في سيرك لابس وش تاني
لابس وش تاني
