معلومات مهمة ومفيدة للعسليات فى المطبخ
متابعه غاده المصري
لو الحله سخنت على النار ما تحطيش السمنه او الزيت على طول هيتحرقوا حطى البصل الى هتستعمليه هياخد الحراره وبعدين حطى الماده الدهنيه
اى حاجه على النار عاوزين تزودوها ميه لازم الميه تكون سخنه جدا
قبل ماتحطوا الكاكاو للكيك انخليه علشان مايعملش تكتلات
لو بتعملى الكيك بالسمنه اضربى السمنه مع السكر وبعدين ضيفى بيضه بيضه
لو بتعملى الكيك بالزيت اضربى السكر مع البيض الاول وبعدين ضيفى الزيت
وانتى بتطبخى او بتعملى رز استخدمى سمنه على زيت
الخولنجان بيطرى انسجة اللحوم بكل انواعها استخدميه فى التتبيله بيسرع السوا جدا وبيساعد على امتصاص التتبيله
( ملحوظة الخلونجان نوع من انواع النباتات مشابه نبات الجنزبيل )
ورق الزهر من عند العطار اطحنوه واستخدموه فى التتبيلات تحفه
كتير من المطاعم بتتبل المشويات بخليط من الخولنجان وورق الزهر والزعتر والروز مارى
محلول النقع بنحط لمون ماينفعش خل
الخل بيخلى الفراخ تشد بيفرتك الفراخ لكن بتشد
استبدلوا الخل بالليمون فى غسيل الفراخ لان الخل بيثبت الزفاره ما بيضيعهاش وفى تنضيف الممبار كمان بلاش خل حطوا ملح وليمون وقشر الليمون
الخل ممكن نضيفه للكبده للبطاطس معلقه منه على الكيك وفى الشاورمه
اظن كده انتهت اسطورة الخل
انا بستعمله كمان فى التنضيف وفى القضاء على النمل وبحط شويه على البريل
اعملى ازازه بخاخ حطى فيها بريل على شوية خل وكملى شوية ميه هيوفر جدا فى البريل او النوع الى بتستعمليه
قبل ماتحطى اللبن فى الحله على النار حطى معلقتين ميه لا يمكن يلزق ابدا
اللحمه الضانى لو هتشويها التتبيل قبل الشوى على طول
لو هتسلقيها ضيفى نص معلقة خل بتساعد على سواها بسرعه وكمان بتضيع الطعم شويه والريحه للناس الى مش بتحب ريحتها
لو خزنتى الكرنب ورق بعد ماتحشيه اسقيه بشوربه ساقعه علشان مايجلدش
ورق اللورا بيساعد على تفتيح لون انسجة الفراخ وانتى بتسلقيها
لو عندك توم ناشف وفصوصه صغيره انقعيه فى شوية ميه وبعدين قشريه هيبقى سهل
لو بتقطعى خضره او اى حاجه خضرا ورقيه حطى على لوح التقطيع رشة ملح علشان ما تتطايرش منك
فى اكلات ماينفعش نغطى الحله واحنا بنسويها زى العدس والبصاره والويكه والرز بلبن والمهلبيه والمربات
فى اكلات ماينفعش نغطى الحله بعد مانسويها مش واحنا بنسويها بس زى الملوخيه والسبانخ ده وهما لسه سخنين طبعا.
