فنون التربية الحديثة للأمهات فقط
متابعه.. شيماء العراقي
وانتي رايحة تذاكري لابنك أو بنتك؟
افتكري أن إبنك حتة منك ما تخلي حاجه تافهة تخسروا بعض.
حاولي تختاري الوقت المناسب للمذاكرة لا بعد ما بيرجع من المدرسه عشان بيكون تعبان ولا بعد الغداء بيبقى تقيل وبعد ما بينام الظهر بيقوم وخمان ولا بعد ما يتحمم لأنه يريد أن يرتاح.
اختاري وقت يبقى فيه مصحصح معاكي اتمنى ذلك بإذن الله
خرجي أي أطفال من أوضة المذاكره عشان فجأة هيحب أخته اللي كان لسة مديها شالوتين وملبسها في الحيط و هيكتشف فجأة أن عنده اخ اصغر منه و هيتفاجي اكثر ان اسمه اسر وأن عايش معكم بقاله خمس سنين
خلي جنبك كولدير مياه عشان يعطش 50 مرة.
زاكري في اوضه جنب التواليت عشان هيتزنق منك 15 مره
ما تضيعي شقى عمرك على الاستيكرز على عشان هيزهق منه بعدها بيومين
لو حضرتك قولتي معلومه 20 مره ما هيحصل حاجه قوليها بصدر رحب وانتي مفرفشه بدل ما تخسروا بعض على ماده ما تستاهل اصلا
جو التحفيز مفيد شجعيه وقولي له لو خلصنا الواجب هنحرق الكتاب يا حبيبي هيبقى فوريرة..
اقفلوا التليفزيون في البيت كله ما تخلي حد يتكلم عشان هو راخي أذنه في أي كلام ..
وهو بيذاكر هيفتكر يحكيلك صاحبه ايمن قرصه النهارده وأن عمر أكل قطمه من سندوتش وليد ان الميس عطست مرتين خلي على قلبك مراوح قولي له لما نخلص سوف نتكلم مثل ما انت عايز
الأسئلة بتاعت الفلاسفة زي ليه الكورة مدورة ليه مش بناكل التراب كل ده هيهل عليكي وأنتم بتذاكروا طنشي إستهدي بالله
أوعي تقولي له ان الميس قالت حاجه غلط كله إلا كلام الميس ده خط أحمر يا أمي.
ما تستغربي من جوه الحنان المفاجئ المفرض والمشاعر الجياشه اللي بتهب فجاه وانتوا بتحلوا الواجب يقوم يبوس ايدك ويقول لك عايز أروح أحضن بابا وأسلم على أختي كل هذا متوقع
حاولي تنجزي عشان إبنك مش ثانوية عامة عشان مرارتك وصحتك.
