إن كبر ابنك خاويه
متابعه.. شيماء العراقي
بس لو مفيش عدل في المعاملة الغيرة بين الاخوات هتزيد
هتقولي لي الكبير حساس اوي هقولك طبيعي مهي مشاعر انسانية حق كل انسان انه يعيشها ما بالك طفل لسة مش فاهم اللي هيحصل لما يجي حد اصغر منه في البيت ، مش هقولك هيتنافس معاه علي الحب لإنه صغير مولود ميعرفش يعني ايه منافسة
بس علي الاقل هيقسم الحب اللي كان للأول بس، يعني لو حبك كله كان للأول في وقت من الاوقات، حبك هيتقسم النص مابينهم
بس خليني اقولك تعملي ايه
١. بلاش اي نوع من انواع التهديد حتي لو بهزار، حرام نكسر قلب طفل، بلاش نوعية الكلام زي بكرة يجي اللي هياخد مكانك، انتي خايفة مامي تجيب بنوتة احلي منك ، بكرة هتتركن علي الرف
و بجد احنا مش بنتوصي في اننا نفرس و نكيد طفل و نكسر بخاطره و قلبه، و ياريت لو دا بيحصل من حد في العيلة حاولوا كأب و ام تمنعوا دا نهائي ممنوع طفل يسمع كلام زي دا ابدا
٢. اكدوا علي الحب وروا الكبار صورهم وهما صغيرين وروهم كنتوا بتحبوهم ازاي و ازاي كانوا صغيرين و كانوا دايما علي حجركم وفي حضنكم و اكدوا انه احنا بنجيب اخ او اخت عشان نكبر العيلة و نلاقي اخوات يساعدونا و يحبونا و دا عمره ما هيقلل ابدا من حبنا لبعض بمعني
– هفضل احبك مهما حصل.
– اوعي تخاف من اي حاجة واحنا جمبك.
– طول عمري بحبك.
– اخوك دا جاي عشان يفرحك.
– اختك هتيجي عشان تكون صحبتك.
– هجيبلك اخ عشان تلعبوا سوا و تكبروا سوا.
– بحبك زي ما بحبه
٣. العدل مهم و ناخد بالنا منه
هجيب للصغير هدية، نجيب للكبير هدية
هجيب للولد لعبة، هجيب للبنت لعبة
هحضن الصغير يبقي هحضن الكبير
هدلع الصغير يبقي هدلع الكبير
هبوس الصغير هبوس الكبير
هفوت للصغير غلط، يبقي هفوت للكبير غلط
مش هضغط علي الكبير عشان اعيشه دور الكبير المضحي
الصغير غلط في الكبير، يتعاقب لو سنه يسمح
الكبير غلط في الصغير يتعاقب
مش بعاقب حد قصاد حد
مبنضربش المربوط عشان نخوف السايب
مفيش حاجة اسمها اديله حاجتك دا صغير وانت شحط كبير
مش بقارنهم ببعض لما وهما صغيرين ولا لما يكبروا
مش بنوصف العيوب ابدا قصاد بعض ولا قدام حد
مفيش حاجة اسمها دا الصغير اللعبي و دا الكبير المشاغب
مش هنفرح و نلعب مع حد والتاني حزين او مكسور او متضايق
مش هنخرج و نسيب الكبير عشان عيان
مش هنلبس حد هدوم جديدة والتاني ياخد من وراه
مش هنخلي حد شيك اكتر من التاني عشان التاني بيبهدل نفسه في اللعب
المساواه لحد ما نكبر و نفهم فنعاملهم بالعدل بمعني ان احتياجك غير احتياج اخوك بس لو هعمل للكبير هعمل للصغير لكن في موقف تاني ..
٣. الخوف الزيادة علي الصغير
طبيعي الاتنين ولادك، بتخافي علي الاتنين قد بعض اللي مش طبيعي انك تزودي قلقك علي الصغير بإنك تضغطي علي الكبير ..
مش مسؤلية طفل ٣ او ٤ او ٦ سنين انه يخلي باله من اخوه، اه ممكن في بعض الاوقات يساعدك معاه، يساعد لو قادر مش مجبر انه يعمله كل حاجة و يسيب لعبه عشان يجري وراه ا يخلي باله عليه
هو كمان لسة طفل، لحد ما يتم ١٢ او ١٤ سنة اه وقتها لو في اخوات صغيرين اديله قدر من المسؤلية تجاههم و اشيلها له بالتدريج من الصغر في انه يساعدهم لكن ميفنيش حياته عشانهم
و بلاش اول ما البيبي يجي نفضل نحذر اوعي تلمسه، اياك تيجي جمبه، اوعي ايدك عنه ، دا بيحسس الكبير انه الصغير بقي اهم بكتير منه وانه بقي مصدر اذي و خوف فيخوفك اكتر عليه و يضربه او يخربشه او يشد شعره او يقرصه
قوليله
– تعالي هخليك تلمس ايده.
– ايه رأيك تقعد جمبه ولو عيط تعالي انده عليا.
– بص هو صغنن انا بشيله بالراحة جدا لما يكبر شوية كمان هخليك تشيله معايا بس مش لوحدك عشان ممكن يقع او يتعب .
– تعالي نتصور سوا انا وانت وهو.
٤. افصلي ما بينهم
سواء في علاقتك بيهم او في علاقتهم ببعض، بمعني انك تقضي وقت خاص مع كل واحد مش لازم ابدا دايما نقعد سوا و دايما نحب كل حاجة زي بعض و نقول كل حاجة قدام بعض
اكيد كل واحد له شخصية و له خصوصية.
و ثانيا افصلي ما بينهم خلال اليوم خلي لكل واحد وقت يقضيه لوحده عشان يوحشوا بعض و يعرفوا ازاي يتعاملوا مع بعض.
طول ما هما طول الوقت قصاد بعض هيعملوا مشاكل اكتر و اكبر.
٥. عاملوا البنت زي الولد
و افهموها زي ما انتوا عايزين سواء في شغل البيت في الطموح في الدراسة
و مفيش حاجة اسمها خلفة البنات احسن و الولاد صعبين او البنات عايزين عين عليهم اكتر من الولاد، كله محتاج نفس الاهتمام و المراعاه لإن الزمن بقي صعب علي الكل
