إمتى الطفل بيسنن تعرف على مراحل التسنين عند الأطفال
إمتى الطفل بيسنن تعرف على مراحل التسنين عند الأطفال
إمتى الطفل بيسنن تعرف على مراحل التسنين عند الأطفال
متابعه.. شيماء العراقي
التسنين ممكن يبدأ من الشهر الرابع لكن غالباً من ٦ – ١٠ شهور
١ % بيبدأوا التسنين قبل ٤ شهور و ١ % بعد سنة ( وفي الحالتين ممكن نحتاج نزور الطبيب علشان نتستبعد أي أمراض )
أحيانآ فيه طفل بيتولد بسنه وفيه طفل بتطلعله في أول شهر ودي بنشيلها في حالتين
▪️لو مش ثابتة ( بتتلخلخ ) ﻷنه ممكن يشرق فيها
لو عملت مشكلة كبيرة مع الرضاعة
الأسنان اللبنية ٢٠ سنة أولهم ظهورا القواطع في الفك السفلي وبعدين الفك العلوي وبعد كده الضرس الأول وبعدين الأنياب وبعدين الضرس التاني
الأسنان الدائمة ٣٢ سنة بتبدأ تطلع عند سن ٦ سنين وآخرهم ضرس العقل عند ١٧ – ٢١ سنة
وقت ظهور الأسنان عامة ممكن يختلف عن متوسط الوقت الطبيعي بفترة من ٦ – ١٢ شهر
علامات للتسنين
دفيان بسيط ، شوية زهق ، إسهال خفيف ، سدة نفس
تورم اللثة وأحياناً اللثة بتزرق مكان السنة اللي هتطلع
ناخد بالنا لو زن كتير ( ومش عارفين نسكت الطفل ) أو إسهال شديد أو حرارة فوق ٣٨ أو رفض تام للأكل أو مش راضي ينام أو الأعراض لفترات طويلة أو أي علامات مرضية أخرى ده مش تسنين ولازم كشف
اللعاب الكتير ( الرياله ) ووضع الإصبع في الفم عادي في السن ده من غير تسنين
إزاي نخفف ألم التسنين
العضاضة
فيه نوع بيحتوي على سائل ممكن نحطها في التلاجة ( مش الفريزر ) تبرد شويه والطفل يعض عليها فتسكن الألم
بس ناخد بالنا
في التلاجة مش الفريزر ﻷن البرودة الشديدة ممكن تضر باللثة أو العضاضة نفسها تفتح والسائل اللي فيها يتلوث
لازم نوع كويس ونعقمه حسب تعليمات الشركة ( أحياناً النوع ده بيسيح مع الغليان )
ماينفعش نعلقها في رقبة الطفل ( زيها زي التتينة ) علشان نتجنب الإختناق – لا قدر الله –
مساج بالإصبع ( بعد غسيله جيداً ) للثة المتورمة
لو زاد الألم ممكن ندي سيتال أو بروفين عند اللزوم فقط بس مش بانتظام ( علشان نقدر نتابع الحرارة لو زادت عن الحد المسموح به مع التسنين )
الممنوع
الأكلات الصلبة زي قطع الجزر لأن الطفل ممكن يشرق فيها
المسكنات الموضعية زي الجل ( تركيزها بيخف بسرعة في اللعاب ، ممكن تعمل مشكلة مع البلع ، وممكن تمتص في الدم وتضر بالطفل )
تسوس الأسنان
تسوس الأسنان هو أكثر مرض ( أيوه مرض ) مزمن شيوعاً في الأطفال
وهوا كمان مرض معدي يعني بيتنقل من الأم للطفل وممكن من طفل لطفل في الحضانة
إيه المشكلة من تسوس الأسنان اللبنية مش هيه كده كده هتبدل
ممكن يحصل خراج وممكن ينتشر – لا قدر الله – ويعمل خراج بالوجه أو الرقبة ونادرا خراج بالمخ
مش عاوزين السنة اللبنية تقع بدري أو يضطر طبيب الأسنان يشيلها علشان تحافظ على مكانها في الفك
ده غير الألم اللي أحياناً بيكون شديد جداً على الطفل
إزاي نحافظ على أسنان الطفل
التقليل من السكريات في أكل الطفل
ممنوع الطفل ينام على الببرونة خاصة لو فيها عصير
زيارة دورية لطبيب الأسنان تبدأ من أول ما يتم السنة الأولى
استخدام معجون الأسنان بانتظام
لازم يكون بيحتوي على مادة الفلورايد
يبدأ مع أول سنة تطلع
مرتين في اليوم
كمية المعجون بحجم حبة الرز تحت ٣ سنين ومن ٣ – ٦ سنوات بحجم حبة البسلة ( مفيش منه ضرر لو بالكمية الصغيرة دي حتى لو الطفل بلعها )
لازم نساعد الطفل في السن الصغير وماننساش ننضف بين الأسنان كويس
إزاي نمنع العدوى من الأم للطفل
الأم تكشف على أسنانها قبل أو خلال الحمل وتعالج بدري أي تسوس
▪️تجنب استخدام نفس الملاعق والأطباق والفوط وبلاش فكرة تعقيم التتينة بلعاب الأم
▪️فيه دلائل إن مضغ الأم للبان اللي بيحتوي على مادة الزيليتول ( xylitol chewing gum ) من ٢ – ٣ مرات في اليوم بيقلل التسوس عند الأم وبالتالي بيحمي الطفل كمان
