ماحبتنيش… الشاعرة هبه جمال
ماحبتنيش
ولا شوفت دليل واحد
يثبت إنك حبِّيت
أنا شوفتك أهل و عزوة و بيت
و كلام الدنيا دي مايكفيش
يوصف شوقي
ياما كنت تغيب و بصبَّر نفسي
و أقول روقي
معلش ظروف و هيرجعلِك
و رجعت انما بعد ما ملِّيت
ماتلومش عليا انما م العدل
تلوم نفسك
لو كنت مكاني
و قلبي إللي ف حُزنك حبسك
كنت هترجع ؟!
لو قولتلي آه
تبقي إنت أكيد حاجة من اتنين
ياتكون كداب يا بجد عبيط
أرجعلك ليه ؟
ده أنا كنت ف حُبي بسقسقلك
و أنت إن ردِّيت بيكون تنقيط
ماتفكرنيش الله يخليك
ده أنا لسه بحاول مع قلبي
ينسي الأوجاع و ماهوش قادِر
و ليلاتي قصاد عيني يجيني
و يعرضلي شريط !!
