جاي و فاكر … الشاعر أحمد حسن عمر
جاي و فاكر
إني ح أقبل اعتذاره
جاي و فاكر
إني قاعدة ف انتظاره
و المفاجأة
إني مليت من خداعه
و من صفاته
و من حواره
جاي و فاكر
إن كلمة تعيدني تاني
جاي و ماداد أيده
و معاه ابتسامته
إللي كانت من ثواني مدوباني
و إللي بيها رضيت
و عشت سنين حصاره
لما كنت ساعتها عاشقة
و هو كان قاسي و أناني
كان بيروي الورد مني
بسيل مراره !!
قاللي نكته
بس ما ضحكتش عليها
أصلي مليت من هزاره
و الدموع إللي ف عيوني
مضحكاني!!!
قلبه دايما شقة فاضية
و إللي تسكن بالدموع
تدفع أيجاره
ألف أوضة
و 100 ضحية
و إللي يمشوا
يبقوا بالنسباله غاروا
القناع دا قناع ملايكة
و الشيطان من جوه زاره
و الوسامة ( حية ) سامه
و المشاعر من سمومه
استجاروا
هو قاعد جنبي فعلا
بس قلبي ماكانش جاره
قلبي كان من كتر غدره
ف حته تاني
قلبي كان واخد قراره
قلبي كان رافض مساره
جاي و فاكر
إني ح أقبل اعتذاره
