قلبي الطيب .. الشاعرة إسلام العيسوي
قلبي الطيب
كان مستني
أي إشارة
أو حتى دليل
حاسس تغيير
مستني كلمة
تقولهاله
تعمل تعديل
تخرج من خانة
على التانية
تبقالي خلاص
كل الدنيا
و ماليكش بديل
يا قريب و بعيد
و ف حبك عايشة
الشوق بيزيد
غايب حاضر
و ف بعدك عني
النار بتقيد
و بالوم نفسي
علشان مش ملكي
و مش حقي
و دايماً بحتار
بين قلبي
و بين جرح كرامتي
بين راحتي و بين
أرضي ضميري
و برغم الوجع
إللي في قلبي
أنا عايشة
و بستنى إشارة
بتمنى تجيلي
و تلحقني
و تجيبلي معاك
أي أمارة
بتقولي إنك
صح شاريني
و أنا راضية أبدئها
و بشروطك
و أنهيها أكيد
وقت ما هتحب
بس أخرج كسبانة
وجودك
و ده عهد عليك
واجب التنفيذ
أنا عارفة
إنك جوه متاهه
محتار و حزين
و بتسأل نفسك
تعمل أيه
و الا تروح فين
و التوهه يا روحي
مدارها كبير
و العمر إللي باقيلنا
قصير
عمال بيضيع
عايشين
ولا حاجة بتتغير
و أنا عايشة
و صابرة
و بتمنى
لخريفي
في يوم
يقلب لربيع
و أنا فعلاً
مش قادرة أخبي
القلب خلاص
عايزك بيته
و الروح بتروح
م اللهفة عليك
لو حتى تكون
ذنب خطيته
و التوبه تكون
و أنا ملك إيديك
طب أقولك أيه ؟!
تيجي نخطف فرحة من الدنيا ؟!
و نقابل بعض
بروح تانية
و أنا وعد عليا
و كلي حنين
هبقالك ست
و هاملى العين
و ألغي رجولتي
و خلاص أنا ناوية
بطبعي ألين
و أنسى قساوتي
و أسقيك الحب
و كلي حنين
و تدوق الشهد
بصبري سنين
و نجدد عهد
ما بين قلبين
إننا حبيبين
و الذكرى تقوي
إللي ما بينا
و ع إللي ما بينا
نفضل باقيين
