بره الدنيا … الشاعرة إسلام العيسوي
محتاجة أعيش بره الدنيا
و ماشوفش بعيني جراح تانية
مايحسش قلبي و لو ثانية
يتبدل حالي و أحوالي
من عيشة لموت
محتاجة لغيبوبة تاخدني
و أغرق في سكوت
مش قادرة أتكلم أو أنطق
و أنا عايشة في دنيا
شعارها جحود
و بشر جبروت
و قلوب بتموت
و في ناس من الحزن
و م الحسرة
مش قادرة إنها ترقع بالصوت
مش شايفة عيوني غير الأنياب
بسمع في زئير
و أسمع في صياح
عايشينها في غابة
نخاف بالليل
و نخاف لو شوفنا بعينا صباح
الظالم يدبح في المظلوم
و كمان بيلوم
و بدمعة ظالم و بقسوة
نيجي ع المظلوم
خايفين لا بكلمة حق نهون
يهدر دمنا إنسان مجنون
يهتك عرضنا بخيال و ظنون
شايف نفسه محور للكون
و الكل كواكب في مداره
و بأمره تدور
دنيا و غابة و ماليها قانون
و تعبت خلاص و شبعت جراح
و تعبت أسمع لكلام و نباح
قويني يارب أنا نفسي أرتاح
و أرتاح إزاي ؟!
أرواح في رقبتي
و حمل تقيل
و الضهر يميل
و كتافي خلاص
مش قادرة تشيل
و براح الكون
ضاق في عيوني
و طريقي طويل
مشياه بأصول
في دروب عتمة
و مش لاقية النور
إنجدني يارب
أنا عايشة بقالي كتير صابرة
و كتير قالوا أصبر هتنول
