سوقي أوي …الشاعر أمير فياض
واتلكِّـكي
إنّ الطريق مسدود يمين
وانّ العَجَل مشدود شمال
واتحكّمي
في العقل والناس والسنين
قصِّيلنا من عدد العيال
واتقصَّعي
قولي ان كيلو الزيت بـ١٦ دولار
كيلو الخيار ٢٠٠٠ جنيه و ٢٠ مَشال
وانّ الطماطم هيِّـنَه بـ٥٠ جنيه
حِزمة خضار ٧٠ ريال
واتمتَّعي
صوت النواح نغمِة جيتار
مصنوعة أوتاره بْـ حبال
تـُشنُق مدامات الحريم
تبكي الرجال
عطشان يا نيل تشرب نداها وترتوي
نجمة سماك مِتكَبَّره تسقيك حنين
غلبان عشان مستني تفهم “بُحتري”
معناها ايه ؟! والفهم محتاج مُلحدين
سوقي أوي
دوسي الأيادي المَمدودالِك عَ الطـُّرق
سـُكِّي الزُّقَـق .. رُشِّي العوَق .. زيدي القلَق
ضُمِّي اللي مِتعوِّد يخونِك
عادي اللي مِتعوِّد يصونِك عَ الملأ
عادي اللي مِتعوِّد يحاسبك بالقلم
واخد عليكي مخسَّراه كل الورق
واللي سرَق .. مالهوش جِزا
الكل واقف في الحِزا
وانا وحدي واقف عَ الرصيف
السيف سِنونُه مأجزةْ
والصيف سَبَق
بين اللي نازل من شعاع الشمس
عَ الأرض الكريمة يجيب زهور
واللي على مهلُه بينزل للي شقيان يستغلُّه وينهبُه
ويزيد في مأساة الفقير .. ويزيد في غرَقانُه غرَق
الصيف سبَق وانتي الشتا
مستنيانا نعيش بـ علَّـةْ نموت في أقرب وقت ممكن
بتحبي فينا النخوةْ يمكن
ولكين بتكرهي مين يزِينِك واللي يهينِك أو يشينِك تعشقيه
قررت اهد الحب بينا واقول يا حلوة انا باكرهك
واكتب في عقد “الكره واجب يا اسمك ايه” وامضي عليه
