نفسي أسألك
للشاعر علي نجيب الشراري
نفسي أسألك ………
من دون الناس حبيتك ليه أنا معرفشي
و اخترتك تبقي وليف للروح
و اختارت إن أسهر وياكي
و ساعات الشدة بوجعي أبوح
يا ملاكي ياعمرى يا روح الروح
مالاقيش في الدنيا مثيل ليكي
جوا عنيكي لمعان عالي
بيزيد لما بتبقي ف حضني
إزاي مخطرتيش علي بالي
و إزاي من غيرك ضاع عمري
إزاي بيقولوا الليل في ضلام
و بطيفك بس بشوف قمري
مش عايز حاجه من الدنيا
غير بس إني أكون لك محبوب
لا هلوم ع الماضي و لا أعاتب
أنا بس ف حضنك عايز ادوب
نسيني همومي و أحزاني
خليني أشتاق لك لو لحظات
أنا عارف إن هواك مكتوب
و نصيبي إن أحبك ب أهات
كل البدايات بتكون حلوة
و ساعات الدنيا علينا تضيق
لو يوم هيضيق قلبي بوسعه
راح أخلي العين و النن مضيق
أنا عندي براح بيساع الكون
ف إزاي الروح لحبيبي تضيق
خليني في بالك و لا تنسيش
إن أنا مختارك من دونهم
بصي ف ملامحهم و أنا جمبك
هاتشوفي الحسرات في عيونهم
