آخرك فاضي … الشاعر أحمد هلال
آخرك فاضي
أنا آخري أنا جبته معاكي خلاص
و حنين القلب المتكسح لعنيكي السود
بقى مش موجود
ياحكاية العمر الفايت لسه من الشبابيك
شوفلك شماعة تليق بالدمع إللي ف عينك
قلبي إللي شاريك
بقى مطمن إن الأيام إللي مابينا
عدت عالكيف
و برغم إننا جوه الدنيا فالموت واحد
و أنا لو واخد
تفكيرك حبه أنا كنت نسيت
يا إللي إنت مشيت على ورد الروح
و أنا وحدي مشيت لعنيك ع الشوك
أول ما افوق
هاخد حق إللي سهرته أيام م النوم
و إن كان ع اللوم
قلبي اتسرسب ليك طايش زي العصافير
حواديت حواديت
لا غناها الحلو بيطربنا
ولا لحمها بيسد الجوعه
و أهو عاش ممنوع من ممنوعه
وف الإسم جيران
أنا ياللي زمان
شفت الفستان
قلت نصيبي
و إنتي إللي نجحتي ف تعذيبي
و سبتيلي الموت
لا كلام هيرجع أحلامي
ولا حتى سكوت
ولا حتى الضحكة المصنوعه
هتصحى القلب بزحمتها
ولا حتى الشامه إللي حليتها تنفع تتشاف
قلبي إللي مفيش أبدا منه بقى ليك خواف
اه ياللي الصبر شربته فكاس و نيست تفاصيله على عيوني
و بقولك لو ينفع كنتي
لكن زي ماكنتي تكوني
زي ما حبا لي إننا أصحاب
أنا برضه الباب بيساعي كتير غيرك لسه
و عشان مانطولش الموضوع
هقفلك ع الدرس الحصه
و هقول يامراد العمر أنا جيت
لكن و حياتك شيء تاني
و إن كان ع الحب المجاني
الله يحنن
