ماتدمعيش… الشاعر محمد رمضان
ماتدمعيش
لما تفتكري إللي سابك
و إللي عابك
و إللي كنتي عشانه جنة
و قال عليكي ماتنفعيش
ماتدمعيش
لما تفتكري إنه باعك
و إنه كان عادي في وداعك
و إنه عاش يلوي في دراعك
و إنتي عادي ماهمكيش
ماتدمعيش
كنتي بيته و كنتي أهله
كنتي صابره عليه في مشاكله
بس شكله ماحبكيش
عيشتي طول العمر جنبه
عيشتي بتسامحيه في ذنبه
بس ع الفاضي و مفيش
إنتي واحده رقيقه جداً
ليه تأمني لحد مؤذي
كان بيتباهى بخصامك
وسط لمه
و إنك المدلوقه يعنى
و قال عليكي كنتي غُمه
و إنتي اُمّه
اُمّه تتملى في جمالك
و إن لو تديها ريق
رامية نفسك ليه في غريق
ما المراكب ماليا بحرك
كله بيمد في إيديه
سايبه كل الناس دي يعني
و مغرمه بس بعينيه
هو يعني كان في أيه
أيه إللي كان يتحب فيه
شكله كان عيل و يعني
كل يوم مع واحدة شكل
كل بنت عرفها قبلك
و حتى ولا منظر ولا شكل
ده إنتي أجمل واحدة شافها
واحدة فعلا اكتشفها
مش مصيرك
ربنا ما أرادش إنك
يبقى زيك زي غيرك
تزعلي؟ و ما تحمديش
ماتدمعيش
مش مقامك
هو أرخص من كلامك
و إنتي غاليه كتير عليه
وقفي سؤالك لقلبك
بطلي تقولي له ليه ؟
ليه يوصل قلب شبهك
للوجع و لكل ده
هو صعب يلاقي زيك
مش كده..
شوفي نفسك برا منه
إجمدي و اتبري منه
قولي عنه إنه عادي
حتى لو قلبك رفض
جربيها الكدبه ديا
جربي تبقي القوية
هتلاقيه قلبه اتنفض
و إن رجعلك وقت زعلك
و إنه نقطة ضعف ليكي
إوعي حتى يهون عليكي
بس لو قلبك ضعف..
ماتبينيش
إنتي تستاهلي إللي يفضل..
عمر كامل جمب منك
أما هو ماحبكيش
ماتدمعيش
