يا واد إجمد … شاعر الغلابة سامح هريدي

يا واد إجمد … شاعر الغلابة سامح هريدي

ياواد إجمد

 ولا تهابِش ولا تخافِش

ولا يهمك

 من اللى فى ضهرك إتكلم ..

ده لو راجل

مكانش قصادك إتبلم ..

معلم.. فعلك الطيب

وحارق خُبث أفعاله

كلامه.. مِاته بيأثر ..

أزاز خايب

قُصاد سيرتك بيتكسر ..

ويتحصر..

 عشان شايفك يا واد ناجح

وحلمك كالحصان طايح

ودايس غِل أحقاده

ف لازم تبقى مُستهدف

يا واد أنشف

وصد الريح بطرف عينيك..

كتير اللمَّه من حواليك

بتشبه زفة كدابة..

يا واقف فى الميدان وحدك..

لا عزوة بتسند الشيبة

لا مال بتداري بيه .. عيبة

يا فارس والسلاح كلمة

تقولها فى وش أي جبان..

وايه يعني ان صاحبك خان

أكيد يا ابني ماهوش صاحبك

ده كان للمصلحة مصاحبك

وكَل وياك.. عشان جعَّان..

ماكانش يا ولدي عيش وملح

ف دوس ع الجرح

وشد العود بعزه وفخر ..

عشان خاين

بينهش جِتتك غِيبة..

فا عادي يا ولدي ميهمكش ..

وميهزكش..

طبيعي الشجرة لو تطرح

هتتحدف يا واد بالطوب..

فا خلي .. صفحته السودة

تِعبي ذنوب..

ولملم روحك الطاهرة

عن المعيوب ..

بناقص يعني لو ناقص

ليه تعتب ..ع الخسيس وتلوم

مدام الدنيا دوَّارة

هيبقى لكل واحد يوم

وكمل سكتك بالخير

وخلي خطوتك بضمير

وأمرك فوضه لله

ومتفكرش يا ابني كتير