رجعت غريب … للشاعر هانى النجار
جيت لك مجروح
ودبحتيني
كان نفسي الاقي ف حضنك بيت
وحلمت بعمر جديد لاكن
العمر انتهي وخلاص مليت
عليت البُنا
وعشمت بحب
براحة قلب
بقصر كببر
حواليه حراس
وبصحبة وناس
ورسمت طريق وعملتك اهل وعزوا بيت
وبكل اغاني الهوا والعشق
اللي اتقالت من ثومة لحد نجاة غنيت
فكرتك صنف يصون العشرة غير الباقيين
حبيتك من غير ما افكر ولا اقول ازاي ولا فين ولامين
ونسيت؟
ونسيت احكي لك عن نفسى ولا جاي منين
انا واحد راجع من غربة
اصلا متخان
عيل خيبان
دايما متهان
كل اللي عِرفهم قلبي زمان
طلعوم خايينين
فاانا قلت زماني هيضحك لي
ويحن عليا وينصفني
اتاريني رجعت ومش فاهم
ولا عارف ايه اللي اتغير في البني ادمين
شكيت !
طبعاً شكيت
شكيت ان العيب مش منهم
مش ممكن
يطلع معظمهم
ظَلمة وقاسيين
وعرفت ان العيب كان مني
لميت الباقي
بوجع الجرح
بكسر القلب
بدمع العين
ورجعت غريب
ولوحدي مشيت
والغيبة طويلة المرادي
مش راجع غير لما اتغير
واحس بجد اني اتربيت
ولا عايز حب ولا اماني
قررت اعيش كده وحداني
انا فوقت خلاص م الصدمة صحيت
