قصيدة بكتبلك …. الشاعر على نجيب الشرارى
بكتبلك
وانا عاجز إني أكون عندك
أو حتي أشيل عنك لاوجاع
أنا كيف متباع والكل سبوه
أنا تايه جوة في أحلامي
والوضع بيسمح إني أتوه
أنا واحد حب يصون ناسه
وأتارى الناس هما اللي باعوه
طب اقولك إيه
أشكيلك ضعفي اللي قَتلني
ولا ابكي عليه
أبكيلك عن حرقة لايام
والمر اللي بعيشه في يومي
وانا كيف مكسور
أنا كيف التور
الكل بيصرف من خيره
ولا لاحظ حد ان انا مبتور
أفراحي بتبقي يدوب لحظه
وبخاف افرح
أنا عاجز إني أكون البار
الإيد متسلسله بالأحمال
وانا شكلي بضعفي هخش النار
كام مرة أقول لك سامحيني
وتبوسي في ايدى وفي جبينى
كام مره تباتي في شراييني وانا عاجز إني يكون لي قرار
ياعفيفة الأه اما بتطلع أنا جوا حواسي بموت وانهار
أنا بكتب من قلة حيلتي
وانا عارف إنك موجوعة
وبترفضي تتهون شيلتك
بدعيلك يتبخر تعبك
والليل يختفي ويبان لي نهار
