صباح الخير ايمان العطيفى همسات جنوبيه
على عيونك
ياصاحب بسمة افراحى
وضحكة قلبى لو دمع
ولهفة شوقى لو ولع
وبدلع …
عليك ياما
صباح الحب والاشواق
وع العشاق
لا ملامة
صباح مرسوم على الميه
فى نهر النيل
وبتغنيها أغنيه
عروسه البحر على شطه
وبتقلدنا ف المواويل
صباح بيعلم العشاق
جميل الصبر
على بعدك
وانا بعدك
يتيمه مجاشى عندى العيد
ماهو انت كنت فستاتى
وتسريحتى
وشريطه تلفنى فيونكة
صباح من أول درنكة
لحد ابو تشت ونقادة
صباحك حب كالعادة
صباحك وردتىن جورى
على خد القمر بايتين
يشقوا ضلمه السمار
فى ليل السهد لو قاعدين
صباحك فل ياغالى
يا مالك قلبي متسجل
وصاحب الملك ماله بديل
لو ايهادى او يأجل
صباح بيمر عبر الليل
على كفى
عشان ييجى لحد عنيك
ياربي كلمة ……..
تكون وصلاك وتكفى
# ايمان العطيفى همسات جنوبيه
