نصائح_مطبخيه خليكي واثقه من نفسك انتي اهم واحده في البيتنصائح_مطبخيه خليكي واثقه من نفسك انتي اهم واحده في البيت

نصائح_مطبخيه

خليكي واثقه من نفسك انتي اهم واحده في البيت

متابعه غاده المصري

انتي لو تعبتي البيت كله هيقع اهتمي بصحتك وبنفسيتك اهم حاجه

خليكي انتي طاقه ايجابيه وانشريها

هقولك علي حاجات هتعمليها تسهل عليكي

 شغل البيت

قومى سريعا يوميا بتلميع الموبيليا على السريع وامسحى السيراميك المكشوف علطول أول بأول بممسحه….السجاد متسيبهوش فترة من غير ما تكونى منظفاه بفرشة وبالمكنسة صدقونى الشغل ده مش بياخد اكتر من ساعة والبيت بيكون فلة

لو عندك بيبى قفلى ابواب البيت وحطيه فى مكان وحطيله لعبه يلعب بيها

والسجادة اللى بيلعب عليها حطى عليها ملاية قديمة او اى حاجة علشان متتبهدلش

لو عندك بنوتات صغيرين علميهم يرتبوا سرايرهم ويلموا لعبهم

فى بقى حاجات عاوزة أقولكوا عليها

يا ريت نحاول نعمل اكتر من حاجة فى نفس الوقت يعنى

مثلا لو واقفين جنب الأكل لحد ما يغلى نكون غسلنا كام كوباية على طبق كدة يعنى

نحط الاكل وعلى مايستوى نكون رتبنا البيت وظبطناه

قاعدين نلعب مع النونو بتاعنا يبقى نطبق الغسيل

نحاول أول بأول نشيل الكراكيب اللى فى البيت اللى ملهاش لازمة يعنى لو فاضيين شوية افرزى الجزم فى يوم…. يوم تانى افرزى الأدوية يعنى علشان ما يكونش في كراكيب كتير فى الشقة ومنتعبش فى ترتيبها

الدولاب بقى لازم اول باول تخرجى كل الملابس اللى انتى مبتلبسهاش ومتقوليش ده ينفع لبنتى احنا مش عارفين بكرة فى ايه وكمان فى ناس كتير محتاجة

الطريقة دى هتخفف الكركبة فى الدولاب

التسريحة بقى متروحيش ترصى عليها كل مكياجاتك

وبرفاناتك لا حطى بس اللى بتستخدميه يوميا زى المشط والمرطب والبرفان الخاص بيكى و الروج وقلم الكحل علشان يبقى سهل عليكى تلميعها وترتبيها

الغسيل لو عندك غسالة اتوماتيك اغسلى علطول ومتجمعيش غسيل عليكى

الشرابات والملابس الداخليه اغسليها اول باول

بالنسبة بقى للبوتجاز غطى الطاسة وأنتى بتقلى علشان الزيت ميبهدلش الدنيا…وأول بأول لو وقعت عليه بقعة نظفيها وغطى كمان الجزء المكشوف من البوتجاز بفوطة مبلله ومعصورة وأنتى بتقلى علشان البوتجاز ما يتبهدلش

عاوزة أقولكو ان أى طبق بنحطه فى التلاجة يتمسح من تحت علشان لو فيه أى أكل ميوسخش التلاجة

الحمام بقى بعد ما أى حد بيستحمى علطول نشفيه

أما تيجى تنضفى ممكن تنضفي الغرفة على أكتر من يوم