فين هيا … الشاعر محمد ياسين الكاشف
و فين هيا إللي تقبلني
برغم حياتي و ظروفي
و ليه الدنيا مش باينة
بلون قلبي
و مش ماشية
على النغمة إللي عاجباني
يا سايباني
في عز التوهة و الضلمة
و مش هاين عليكي تقولي
لو كلمة
و مش عارفة كمان إسمي
و مش فاكره كمان سني
يا أجمل بنت في الدنيا
يا أجمل من بنات حوا
أنا تايه في برد الليل
و مستنيكي تحميني
من النوة
تعالي ف قلبي من جوا
و داوي الجرح بالنظرة
و بالهمسة و باللمسة
أشوف الحب في عيونك
أتوه و اسرح
و أشوفك برضه بالقوة
و فين إنتي و ليه غايبة
و ليه مش عاشقة أو دايبة
و ليه سارحة ف براح ليلك
و رامية القلب بالقسوة
و فين هيا إللي تقبلني
برغم حياتي و ظروفي
و أنا إللي غرقت طول عمري
في بحر العشق و جنونه
و سيبت القلب تاه ياما
في شكه و حيرته و ظنونه
و مين هيا إللي تقبلني
برغم عيوبي و إللي أنا فيه
برغم الحزن و التفكير
برغم إني باحب كتير
ساعات عصبي و ساعات رايق
لكني حنون و قلبي كبير
و طيب بس بمزاجي
عنيد لما الدماغ تقفل
و ياكل حد يوم حقي
أقول الحق لو على مين
و أحاسب ع الكلام بأصول
مادام طلعته من بقي
و شاعر بالقلوب و الناس
و يجري ف دمي موج إحساس
و باكتب شعر عن وطني
و عن أهلي و عن ناسي
و عن قلبي إللي بات ناسي
و عن أجمل بنات الكون
حبيبتي إللي ف هواها باكون
و مش عارف مكانها بجد
عشان العيب ياناس فيا
و فيه بيني و بينها سد
أنا إللي عايزها تقبلني
و تقبل فيا أوصافي
برغم حياتي و ظروفي
برغم هروبي من خوفي
عايزها بس إنسانة
و عندها قلب
نكمل بس مشوارنا
و نسرح جوا أفكارنا
و نبني بحبنا المجنون
جنينة و بيت
