فكرة الحب … الشاعر محمود يحيى

فكرة الحب … الشاعر محمود يحيى

فكرة الحب في أساسها

مش صراع بين خد وهات ..

فكرة الحب الحقيقي لما تدي عشان تعيش

نظره تسوى العمر كله

لمسه ممكن تنسى بيها نص أحزان الوجود

فكرة الحب ف أساسها

قايمه أصلا ع الصمود ..

ضحكه بين قلبين مُناهم لو يدوم الفرح بينهم

باب بيقفل روحه بدري ويرضى بيهم ويآمنهم

حتى لون الورد زَهزه والعبير أهو طل منهم

والحياه صبحت براح ..

فكرة الحب إستكانه

         جوه حضن سكوته باح ..

حد بات يحلم ب دنيا فيها إخلاص واحترام

حد تاني كان مصمم يلقى تقدير واهتمام

والنصيب جَمّع مابينهم

صدفه أو مش صدفه عادي ..

فكرة الحب التمادي

تبقى مبسوط ويا منها

بس مش شبعان وجودها

تبقى ونسان من مجرد ضحكها أو بس صوتها

وتبنوا أحلى ذكريات ..

فكرة الحب ف أساسها

مش صراع بين خد وهات .