صباح الخير
الشاعر عبد الرازق الشريف
صباح الخير
علي الضله في عز الهوج
علي النني اللي طالق الموج
يغرق فيها احبابها
علي الروح اللي طارحه الخير
ولا بتقفل في يوم بابها
صباح الخير..
علي كل البشر جمعاً
علي الورد المسح دمعاً
وداري الحب في ضلوعه
وغطي الشمس بطلوعه
وبدل حرها نسمات !
علي اللي ملايكة حاوطوها
وخلوها …
حور مبدور في وسط بنات
صباح الخير..
لاول مره اقولها واحس اني بخير
وان القلب
متونس بنور من عين قمر عالي ..
اغمض عيني تلمحها
بتزغي فروحي وتلالي
وجيالي
وفايته بلاد
ونتلاقى في كل معاد
فأحس ان اللقا دايم
ومش مقطوع ..
غريب قبلك ملوش سكنه ..
ودق القلب كان لعنه
وفيكي العشق كان مشروع ..
فشافك كل احلامه
وايامه
وكل قصايدة والموضوع..
يا اول فرحه جيالي
يا سكنه وبيت وراس مالي …
يا نبضي وروحي وجمالي ..
يا شامخه وحره كيف الطير
في كلمة جاي اقولهالك ” ب ….ك “
جات صباح الخير
