للشاعر محمد البيطار
قالوا مرة إنى شاعر
و إنى بكتب فى المشاعر
و إنى حساس وإنى قادر
أوصف الحب فى حروفى
و أقدر أكتب عن ظروفى
و أعرف أرسم دنيا حلوة
و أمسك الشمس بكفوفى
قالوا مرة إنى شاعر
بس مش عارفين بإيه؟
قلبي شاعر
بالوجع؟
ولا غرقان فى الدلع؟
ولا هايم فى الغرام؟
ولا حس إنه اتخدع؟
قلبي شاعر
بس ساكت
عينى تلمع
دمعى باهت
كل عمرى ف كلمتين
فرحة جاية
و فرحة فاتت
مش مهم إن أبقى شاعر
المهم إن أبقى صابر
ع إللي مكتوب والمخبي
و إنى أحس بقلب جنبي
و إنى أشوف من نبضه دايماً
نور لقلبي
مش مهم إن الكلام يبقى بميزان
الأهم فى كل كلمة
إنها تدى الامان
لسه بتقولوا إنى شاعر؟
طب قولوا لى لو سمحتوا
هو أنا شاعر بايه؟
