الأدب والشعر
قلبك مقبوض … كلمات شاعر الغلابة سامح هريدي
قلبك مقبوض ... كلمات شاعر الغلابة سامح هريدي
قلبك مقبوض … كلمات شاعر الغلابة سامح هريدي
قلبك مقبوض
خايف مش عارف من أيه ..
متأكد من حاجة هاتحصل
هاتسيب م الاخر جرح كبير
عمال بتجمع في الرؤية
وبتحلم تلقى التفسير
زلزال و ضحايا و صحرا و بير
عطشان و الزير مليان تعابين
كل أما بتقطع راس واحد
يطلعلهُ أتنين
تايه و حزين
عمال بتدور علي روحك
مع ناس خاينين ..
بتقدم نفسك في جراحهم
و تكون الضحكة ف أفراحهم
و تدافع عنهم بحياتك
و حياتك شئ بالنسبة لهم
نفَسين نكوتين ..
دخان و مغيم ع الصورة
شجرة و بتدمع مكسورة
الريح بتطير فى فروعها
و بتحكي القصة لزورها
و إزاي الطير فارق دارها
المايه الواصله لشراينها
مين عكَّارها
مررها بفعل الأباليس
انطق يا خسيس
و بلاش للكاميرا تبان كاملاك
و شيطان متعفرط ف الكواليس
كل دي كوابيس
و لا أنا مش نايم و لا بحلم
و دي يعني حقيقة
و لا هزار ؟
و دا برضه نهار ؟
طب يعني إزاي أنا مش شايف
و لا قادر أميز أو احدد
مين إللي أساساً يشبه لي
أما أسمع قلب بيندهلي
الرد بسرعة يكون حاضر
و ف قلب حياته بكون حاضر
و أبقى له حياة
أخلص و أصون يبقى جزائي
ده جزاء سنمار
مابقتش مُجرد أسماء
الشجرة بتتهز بقوة
فَ بتنزل منها فروع كامله
تِجرحنا و بتقول يا فُراق ..
و كأن المشهد ده سباق
أوراق بتودع أوراق
إمبارح واقف بيشيع
اليوم بقى هو المِتشيع
الدايرة الواسعه بِتتضيق
و الروح للمه بتشتاق
كنا بنتنفس بعضينا
و قلوبنا بتقوىَ بضحكتنا
واقفين فى المشهد وحدينا
و الهم مفرق عزوتنا
الكل إتجرح و إتصاب
بقى فيه م الحُزن إللى مِكفيه
بنواسي فى بعض و بنأسي
بندوس ع الجرح عشان نداريه
ف بيظهر جرح جديد تاني
م الكل أساساً بيعاني
دوامة و تايهين جواها
لا عِرفنا دخلنا إزاي فيها
و لا أمتى هانخرج م الاهه
