متابعة / هند البحيرى
ازاى تكوني أخصائي فى بيتك لإبنك مهم جدًا تساعدي طفلك يتكلم بطلاقة؟ وإزاي تخلقي بيئة غنية بالكلام؟
١. كوني المصدر الأول لكلام طفلك
طفلك بيتعلم منك، صوتك هو أول كتاب بيقراه في حياته. لما بتتكلمي معاه، انتي مش بس بتعلميه كلمات، انتي بتعلميه ازاى يعبر عن نفسه. خدي وقتك في وصف كل حاجة حواليه،
🤏قولي:
“بص يا حبيبي، دي تفاحة حمرا جميلة”
بدل ما تقولي “هات دي”.
“إحنا هنغسل إيدينا علشان نحافظ على النظافة”.
كل جملة بتقوليها هي درس لغوي جديد ليه، حتى لو مش بيرد عليكي دلوقتي، دماغه بتخزن المعلومات.
٢. ما تستعجليش طفلك في الكلام
في أمهات بتحس بالقلق لما طفلها بيتأخر شوية في النطق، ويبدأوا يسألوا: “ليه مش بيتكلم؟”
أو “قول كذا بسرعة”.
الضغط على الطفل مش هيخليه يتكلم أسرع، بالعكس ممكن يخليه يتوتر ويقلل محاولاته.
بدل ما تضغطي عليه، استخدمي أسئلة مفتوحة:
بدل ما تقولي: “عايز مية ولا عصير؟”
قولي: “تحب تشرب إيه؟”ده بيدي له فرصة يختار ويعبر بحرية.
٣. امنحي طفلك وقتًا للاستجابة
طفلك محتاج وقت علشان يجمع كلماته ويرد عليكي، فلا تقاطعيه ولا تكملي كلامه بدلًا منه.
لما تسأليه سؤال، انتظري لحظة، بصي في عيونه، وإديله فرصة يعبر بطريقته.
٤. قللي من إستخدام الأجهزة الإلكترونية
الشاشات مشكلة كبيرة في تأخر الكلام، لأنها بتخلي الطفل متلقي فقط، مش مشارك.
اللغة محتاجة تفاعل بشري، مش فيديوهات متكررة.
لو طفلك بيقضي وقت طويل على التابلت أو الموبايل، حاولي تقلليها بالتدريج وتستبدليها بأنشطة تفاعلية زي اللعب، القراءة، والحديث المباشر.
٥. إحترمي مشاعر طفلك أثناء الكلام
الطفل بيتعلم الكلام لما يحس بالأمان، لو اتعرض للسخرية أو التصحيح الدائم بطريقة سلبية، ممكن يبدأ يتجنب الكلام خوفًا من الغلط.
بدل ما تقولي “لأ مش كده، غلط!
جربي تقول: “واو، قربت جدًا! الكلمة الصح هي كذا 👏
تعال نقولها سوا”.❤️
٦. إلعبي معاه بصوتك وحركاتك
الأطفال بيحبوا التقليد، ولو شفتيه بيحاول يقلدك حتى لو بطريقة غير واضحة، ده تطور مهم.
غني معاه، قولي كلمات غريبة بأصوات مضحكة، إستخدمي إيدك وإيماءاتك أثناء الكلام.
اللغة مش مجرد كلمات، اللغة إحساس وتواصل!
٧. إمتى أحتاج لإستشارة أخصائي تخاطب؟
♦️لو طفلك ما بدأش يقول كلمات واضحة بعد سنتين.
♦️لو عنده صعوبة في نطق الحروف بعد ٣ سنوات.
♦️لو بيتلعثم أو بيكرر الكلام بشكل مفرط.
♦️لو مش قادر يكون جمل مفهومة حتى بعد ٤ سنوات.
#امل_اشرف_اخصائية_تخاطب
