عركة دايرة … الشاعرة إسلام العيسوي
الخناقة قايمة دايماً قلب عقل و كبرياء
العقل رافض ليه يشوف
كل إللي بتشوفه العيون
القلب حاسس سحر جاله
شايفه و يتمناه يدوم
و الكبرياء المعترض دايماً عنيد
دلوقتي ليه ؟!
طالب خضوع
العقل حاسس بالجنون
و القلب حالته ملخبطة
حيران ما بين غيرة و ظنون
ملهوف بشوق مليان بخوف
لا الفرحة تبقى مؤقتة
أحاسيس كتيرة مُشتتة
واخدين أوامر خط سير
و المخ رافض يستجيب
ماشي في عكس الإتجاه
إزاي يسيب الجسم تايه
بين و بين ؟!
دايب حنين
طالب يلين
محتاج لحب و طبطبة
رافض يِدين
قلب و مشاعره ملخبطة
نبضاته بردت م السنين
إتجمدت طالبة الغطا
تتدفي بيه من كل عين
باردة سهامها مرشقة
في جتة تعبت م الطمع
صبحت مسامها مشققة
تعبانة من كتر الشقا
هربت بنفخة لنيكوتين
تكتم في صرخة مكتفة
يمكن تخفف يوم حمول
كات زايدة من كتر الجفا
تتمني لحظة بدون دموع
يمكن تحس في يوم وفا
منتظرة طلقة صوت لقلب
حضوره يغلبها بدفا
و القلب يرفع راية بيضا
و العقل يعلن الإنهزام
و بكلمة واحدة م اللسان
تعلن نهاية المعركة
و الجسم مستسلم كمان
رافع رايات الإنتصار
على عركة خلصها الهوى
في ليلة و بلحظة صفا
