سحر الهوى … الشاعر وحيد محمد
و جاتله و كان حزين جدا
و شالت منه كل الهم
ف عز ما قلبه متكسر
بسحر هواها فجأه اتلم
يا قهوة بطعمها ف روحي
صباح مظبوط ف كوباية
يا كيميا زارتني فاتفاعلت
مع الحزن إللي جوايا
يا حد شبيهي ف التفاصيل
نسيج أرواحنا نفس الغزل
ده قلبي ف عزلة كان مسجون
و صوتها جناح و فك العزل
يا لايقة و سايقة ف دلالك
و من حق الجميل يتقل
يا عارفه و شايفة أشواقي
و خجلي مانعني إني اسأل
يا حاسة حس إحساسي
يا لمس و مس ف مشاعري
يا لزق و قص ع مقاسي
يا خايفة تبادري و تغامري
يا عوضي و دنيتي و ناسي
حروفي عاجزة ع التوصيف
يا تاج والله على راسي
ربيع و احتل عجز خريف
يا عشق فيه الشفا
حضن العيون كافي
كَرت خيطان الوجع
ف رجعت متعافي
بحب وجودي ف وجودها
و أحب وضوحها ف ردودها
لكل حركة مردودها
رزانة كاريزما ويا حضور
دي بنت و زيها قليل
تميل الدنيا ما تميل
نهار وقت أما ب تليل
ف وسط العتمة زي النور
و لو وصفوا البنات بالشكل
ف أنا وصفي فقط .. للعقل
جنانها رزين لكنه ب تقل
و فيها من بنات الحور
و لو ينفع أكون ليها
تحليني و احليها
هاروح أنا فين ف معاليها
أنا موجة .. و هي بحور
نصيبي خذلني ف الماضي
ب بخت أقل م العادي
و قدمت ال CV لروحها
و بتمنى .. يصبني الدور ..
