هتحليٰ الدُّنيا… الشاعرة هبه جمال
أمان حُضنك وبحتاجلُه
مادوقتش م الحنان قبلُه
يااول حَد لو اقابلُه
هبوس القلب قبل الإيد
نصيب حُبك ومتشالِّي
وقلبي من زمان قالِّي
هيجي بصبرِك إتحلِّي
بلاش تستعجلي المواعيد
وجيت و ف عِز أوجاعي
تغيَّر كل أوضاعي
ماعادش ياروحي فيه داعي
لأي دموع ف عيني أكيد
هتحليٰ الدنيا بوجودك
وعودي هيفردُه عودَك
وشوقي يهِد ف سدودك
وهيزيد في اللقا التنهيد
ماعادش فراق هيوجعنا
ومين ياحبيبي يمنعنا
وايه ف الدنيا ليه معني
وعينك عن عيوني بعيد
شعوري بيك ده من بدري
وقبل لُقانا لو تَدري
ياأحليٰ ما جابلي يوم قدَري
شعوري بيك ما كانش جديد
شعور جوايا بالفِطرة
راويني تقولش كات مَطرة
وشافت حالي كان صحرا
وجادِت لاجل خيري يزيد
