للحق صوت … الشاعرة رباب الجورية
للحق صوت
نعم للحق صوت
لكنه صوت زي الحفيف
عضمه ضعيف
خايف يصيبه البرد يوم..
و فى عز حر الصيف يكون
لابس كوفية و بلطو من النوع التقيل
ماشي هناك جنب الرصيف
خايف لشمس اليقظة تصحى
و فى لحظة تفلت ايدها منها و تلطشه..
فتجيله ضربة شمس حامية
و تبان عضامه مخوّخة
من قلب شبابيك السكات
و تعري اسياد الكلام
و تشد من فوقهم غطاهم
بعباية سودا مطرزة بجبن السلام
للحق صوت
نعم للحق صوت
مكتوم فى حلق إزازة ساقعة مشبّرة
جواها مية أو عصير
ادامها صايمين و الأذان
أذن عليهم من سنين
و ماسمعهوش
علشان ودانهم
ودن من طين
و التانية تشبه للعجين
شادّين رباط الخوف
من قلب مصباح الخرس
و مجديلنه زي الفتيل
حطينه جوة الودن تكتم صرخته
فمايعرفوش وقت الأدان
و لا يسمعوش صوت الندا
