سايسوووه… الشاعر حمدي موسى
مش عارف أكتب تانى و الله
و كأن بير الكلام ناشف و قاعه بعيد
و عشان كده مش سعيد
و من ميدان الكلام الشعرا بيغنوا
و يباركوا و يهنوا….
و كأن أنا من صعيد الشعر جوانى
واقف لوحدانى
و مفيش معاى خلان
أنا من هنا و زعلان العزوة تنسانى
لكن أنا الغلطان
سيبت الكلام و مشيت ..
و ذهبت متضايق
و ركبت بحر الشاعر العايق
فالتقمنى الموت
و صبحت من غير صوت …
يارب سبحانك
علمتني الشعر يمكن لاجل أكون إنسان
علمتني الكلمة و أنا فى المبتدأ جاهل
علمتنى الأسماء… و بلدنا تستاهل
و صنعت جسمى رداء….
كل الحروف أعضاء
بيحسوا ويشوفوا
الشعر أجمل مافيه توهانه و كسوفه
و عناده لما يغيب
و رجوعه له فرحة…..
لو قلت له مرحى
و كأنه صاحب بيت……
بيحس بمقامه
و يحط إيده ف جيوبه
يطلَّع المكنون
الشعر لو موزون…
إحنا اللي بنبيعه و إحنا إللي بنذيعه
و الناس بيستنوه ……
الشعر لو هِنتوه
بيروح يقول عدوا
و انتوا اجمدوا و سدوا
لو هج راح و لا جاش
سايسوه عشان بَعده الوقت مبيسواش
و الدنيا مش حلوة علي قد عقله خدوه
من غير قوافي إزاي تستطعم الخلوة
و ازاى تلاقي خضار و النفس فيك جافة
و لا تلعب الرفة ع المعنى و الإحساس
فى الحالتين خسران
أوعى تعلق ع القصيدة رهان
الشعر أصله إنت إنت بتفاصيلك
إنت بعيوبك و قهرك و بتراتيلك
الشعر من جيلك…..حاسس بأوجاعك
هو اللي ثار لما شاف الحق دا بتاعك..
و الخونة بيخبوه
الشعر بيعدوه الثائر الأول
ولذلك الحكام عاوزينه يتحول
يبقي غبي و عبيط
لكنه برضو حويط له سكته و حواريه
و لو انكشف يداريه…. و يغير الوجهة
يبقي الوطن عيان… و الحقنة محتاجهه
يعمل له جمعية ينزل بكام مليون
يقبضها فى الأول
الشعر دا ابن حلال…. و بلدنا تستاهله….
و الشعرا من أهله…..لو تصبحوا علي خير
