مشاعر حاف … الشاعرة وفاء علي
أنا عيشت بادور
جوه وشوش الخلق عليك
أنا طول الوقت أتخيل وارسم
شكل الدنيا في نن عينيك
أنا شوفتك جوه الحلم خيال
فارس خيَّال
شادد ف لجام الصبر
و بيني و بينه بحور و جبال
و وجودك جوه حياتي أكيد
كان صعب محال
الحلم إزاي أصبح واقع
و اتجسد أشخاص و مواقع
و الأمل اتسرسب من طاقة
أصبح متشاف
و القلب اتشجع و اطمن
مابقاش خواف
شبعان من نظرة حنية
و مشاعر حاف
و كأنك دعوة أب زمان
خاف على بنته و جواه شالها
من بعد ما فرق بينهم موت
إداك أمر تخف مشالها
أنا واحدة الستر وراحة البال
حلم حياتها و كل أملها
بالعشق هاتوصل أعلى مكان
تسكن روحها و يرتاح بالها
أنا واحدة الحب قدر وحده
يحييها و يعدل أحوالها
