قصيدة لسه القلب … للشاعر علي فاروق
لسه القلب الدايب فيكي
شايفك نفس البنت إياها
أم ضفاير ليلي بتلمع
غمزة عين الحور جواها
لسه النغزة في حمرة خدك
خاطفة الروح فتروح وياها
إنتي النن لروح الروح
إنتي العشق المش مسموح
…..
لسه القلب بينبض بيكي
عاشقك كلك
أمله يكونلك
عاشق حتى كمان أسوارك
مجذوب بيكي
أسير لمدارك
مهما يزيد عندك ومرارك
بيلاقي نفسه في إصرارك
راضي بكل آلام وجروح
يعمل إيه؟!
ماهو دا الممنوح
