خلي بالك … للشاعرة هناء الكومي
خلي قلبك جوه منك
واوعي يوم تهديه لحد
أو تميلي لأي نظرة
أو غرام ميكونش جد
حطي عينك وسط راسك
واوعي مرة تصدقيه
بكرة يجي ويملى كاسك
طعم مر وتشربيه
كل يوم يجي ب هدية
والهدية معاها ورد
أصله بايع للقضيه
جوه منه ليالي برد
حتى حبه خلي بالك
كفة ناقصة ع الميزان
جوه منها يجوز مهالك
والحقيقة ف يوم تبان
كل كدبة منه طالعة
واخدة يمكن ١٠٠ وسام
عمرها ما هتسقي زرعة
ف أرض محتاجة السلام
حطي الف سور وحاجز
وارفضيه ما يهمكيش
واوعي قلبك يبقى عاجز
عن قرار ما يهزكيش
واضحكي وخليكي واثقة
إنتي مش صورة ف أفيش
مين دي تقبل تبقى صفقة
جوه نبضة ما تساويش
