نوران … للشاعر عبدالرحمن الكحلاوى
نوران
مرسى ووطن
وجناح وبيت
نوران
دليلك لو فيوم حبيت
تحلف بانك يومها ايوة اخترت
نوران
حبة ندا لمسونى وقت خريف وجع
خضرت
برد وحروف تحضن شعور البرد
من امتى قبل اتجرح
تلاقيه بينزف ورد
مين اللى طمن قلبك الغلبان
علشان
ما تخافى يوم منى
مين اللى قال انى
قادر اشيلك جوه عينى سنين
صدقتى مين
صدقتى ليه
نوران قصيدة وسيمفونية ودمعة نزلت ع الخدود ترقص باليه
حبى الوحيد
او كل حاجة كانت حقيقة فوقت زحمة من الخيال
او ممكن اقول
الخضة فعين بنوتة وحيرتى وفرحة قلبي وتنهيدى
النبضة الصادقة اللى بتخرج من قلبى تسلم على ايدى
ومحل الورد فيوم الفاتحة اتقرئت فيه
والمطرة فيوم منعت مأذون انه يجينا
ووصوله وفرحة اهالينا
و عنيا دموع شايفاكى فأجمل فستان
ووجودك جنبى وليا واجمل قصة تكون
انتى
دلوقتى بتكمل قصة حب
وتبدأ قصة أب يسمى
نوران
بنتى
نونو
بابا اللى من فرحته
الدمعة بترقص فعيونه
مستنيكى
ومجهز حضنه يدفيكى
ومجهز روحه عشان تخديها لو احتاجتى
ومجهز قلبه وعقله وكل كيانه يا قلبى واكتر لو عايزة
نعم المولى كتيرة ولكن
والله نوران اجمل جايزة
حاسس بتوتر او قلقان
علشان مش عارف اجيبلك ايه
اعتبرى عنيا معاكى
وقلبى عشان ينبض قلبين
ومحوشلك بهجة وضحكة هما الاتنين
وهخلى الحزن هناك ليا
و هرتب كل قصايدى عشان
اسردها فودنك اغنية
ازاى لسة ف ماما وسامعك
كاتبالى قصيدة بتلقيها
بتهون كل حياتى بدونك
وتشيلى الضلمة وتشرق شمس
سامعك ولاول مرة اشوف
الودن بتسمع باللمس
الحاضر شخبط فى الامس
والدنيا يا دوب احساس مرعوب
قدام وجعك دايما مغلوب
الماما بتتوجع علشان
نونو تنور
و البابا مفيش حل ف ايده
لكن عمال لسة يدور
واقف متصاب بال( اعمل ايه)
فبيدعى وواثق فى اجابته
صوتك يا نوران بتقولى الواء
خرجه علطول من ضيق كبته
فرحه جدا
نسى كل همومه وتفكيره
والله يا نونو انا دلوقتى
ربنا بيفاجئنى بتدبيره
