الـسراب …. الشاعر فارس القرشي
يجوز قلبي اللي هايم فاق
وبطل للسراب يشتاق
يهمك حالي ؟ بـ أتحايل
ألاقي لسمك الترياق
بـ أحاول اشفى من وهمك
وهمّك عارفة ؟ لو هامّك
يوماتي غريق هنا ف يمك
باموت م الحيرة والأشواق
قلوب مرمية على شطك
جماجم سجّلت خطك
دبحتيهم ، وكان شرطك
سنين تحتفظي بالأشلاء
وقلبي غريق مايعرف عوم
نزل بحر الغواية ف يوم
نداه رمشك .. لمين اللوم؟
هالوم قلبي اللي تاه واشتاق
ركب راسه وقال : ياغرام
وكان يحلم تكونوا كرام
عيونك وانتي والأيام
لكن غلطه انه مش سواق
فـ عذرا هاتجه للبر
واسيب قلبك ف كر وفر
عشان قلبك سقاني المر
وحتى المر كان حراق
